Ykdysadyýet - Nesil.com.tm

Sanly ulgamyň giň mümkinçilikleri

Ahmedow — Thu, 26 Feb 2026 21:21:05 +0300

Häzirki wagtda Türkmenistany durmuş-ykdysady taýdan ösdürmäge gönükdirilen maksatnamalar üstünlikli durmuşa geçirilýär. Sanly ykdysadyýetiň çalt ösýän döwründe bu ugurda möhüm işler alnyp barylýar.
Döwletimiziň ykdysady we tehniki kuwwatyny pugtalandyrmak, aň-paýhas mümkinçiliklerini ýokarlandyrmak, halkymyzyň abadançylygynyň bähbidine ylym-bilim ulgamyny hemmetaraplaýyn ösdürmek hormatly Prezidentimiziň alyp barýan döwlet syýasatynyň ileri tutulýan ugurlarynyň biridir. Ýurdumyzda ylmyň, bilimiň, önümçiligiň özara arabaglanyşygyna aýratyn orun berilýär.
Oýlanyşykly alnyp barylýan daşary ykdysady syýasat döwletimiziň üstünlikli we durnukly ösüşiniň möhüm bölegi bolup durýar. Türkmenistan daşary ykdysady gatnaşyklaryny yzygiderli ösdürýär. Ýurdumyz halkara söwda, maýa goýum we tehnologik işlere gatnaşýar.
Türkmen halkynyň Milli Lideri Gahryman Arkadagymyzyň başlangyjy we Arkadagly Gahryman Serdarymyzyň tagallalary bilen Köpetdagyň ajaýyp künjeginde bina edilen, sebitde deňi-taýy bolmadyk Arkadag şäheriniň keşbinde milli binagärligiň iň gowy däpleri binagärlik we bezeg babatda häzirki zaman meýilleri bilen sazlaşykly utgaşýar. «Akylly» şäherde halkara ölçeglere laýyk gelýän toplumlaýyn infrastrukturanyň döredilmegi şäher ýaşaýjylary üçin oňaýly ýaşaýyş-durmuş şertlerini üpjün edýär. şäheriň köçelerinde jemgyýetçilik ulagynyň ekologik taýdan arassa görnüşleri — elektrobuslar hem-de elektrotaksiler hereket edýär.
«Akylly» öý tehnologiýalary ulanylyp gurlan döwrebap ýaşaýyş jaýlary, iki gatly kottejler Arkadag şäheriniň aýratynlygydyr. Öýi dolandyrmagyň intellektual ulgamy internet togy arkaly öýleriň durmuş üpjünçiliginiň, howpsuzlygynyň ähli ugurlarynyň awtomatik we sazlaşykly işini üpjün edýär. Täze şäherde optiki-süýümli kommunikasion ulgamyň ornaşdyrylmagy ýokary tizlikli interneti ulanmaga mümkinçilik berdi. Arkadag şäheri adamlaryň ýaşamagy, zähmet çekmekleri, dynç almaklary üçin iň kämil we amatly, döwrüň talaplaryna laýyk gelýän şäherleriň birine öwrüldi. Ýurdumyzda sanly ulgamyň ösüşleri kalbymyzy buýsançdan doldurýar.

Aýgözel ÇARYBERDIÝEWA
Aşgabat gurluşyk orta hünär okuw mekdebiniň mugallymy

«Ýaşyl» ykdysadyýet ýörelgeleri

Ahmedow — Fri, 20 Feb 2026 19:47:44 +0300

Ekologik meseleler boýunça halkara dialoga işjeň gatnaşýan Türkmenistan adamzadyň geljegi bilen bagly möhüm meseleleriň çözülmegi ugrundaky tagallalary mynasyp goşant goşmak bilen, BMG-niň we beýleki abraýly halkara guramalaryň çäklerinde oňyn hyzmatdaşlygy ösdürmek ugrunda çykyş edýär. şeýle hem Türkmenistan ekologik abadançylygy üpjün etmek babatda täze başlangyçlary öňe sürýär.
Oňyn Bitaraplyk ýörelgelerine we kabul edilen halkara borçnamalaryna laýyklykda, Türkmenistan gaýtadan dikeldilýän energetika, energetika netijeliligini ýokarlandyrmak, biodürlüligi gorap saklamak ýaly ugurlary öz içine alýan toplumlaýyn ekologiýa syýasatyny durmuşa geçirýär. Ýurdumyzda energiýanyň öndürilişikde gaýtadan dikeldilýän energiýa çeşmeleriniň paýynyň artdyrylmagy ugrunda işjeň çäreler görülýär. Ykdysadyýetiň dürli pudaklarynda döwrebap energiýa tygşytlaýjy tehnologiýalar ornaşdyrylýar. Bu bolsa, öz gezeginde, tebigy serişdeleriň sarp edilişini azaltmaga mümkinçilik döredýär.
Ilatyň ekologik medeniýetiniň ýokarlandyrylmagy daşky gurşawy aýawly gatnaşyklary kemala getirmäge gönükdirilen döwlet syýasatynyň möhüm ugry bolup durýar. Giň gerimli bag ekmek çäreleriniň yzygiderli geçirilmegi tebigatyň peşgeş beren mirasyna aýawly garaýan, howanyň üýtgemegine garşy göreşmek boýunça ählumumy tagallalara goşant goşýan döwlet hökmünde Türkmenistanyň halkara abraýyny belende göterýär. Hemişelik Bitaraplyk hukuk derejesine eýerýän ýurdumyz durnukly ösüşi we ekologik meselelere jogapkärçilikli çemeleşmegiň parahatçylyk söýüjilikli daşary syýasatymyzyň möhüm bölegi bolup durýandygyny, umumy meseleleri çözmekde netijeli halkara hyzmatdaşlyga taýýardygyny mälim edýär.
Häzirki döwürde daşky gurşawy goramakda ata-babalarymyzdan gelýän milli däp-dessurlarymyz has-da ösdürilýär. Ýurdumyzda her ýylda geçirilýän ählihalk bag ekmek çäreleri türkmen halkynyň Milli Lideri Gahryman Arkadagymyzyň eziz Diýarymyzy bagy-bossanlyga öwürmäge gönükdirilen ekologiýa ugurly başlangyçlarynyň Arkadagly Gahryman Serdarymyzyň parasatly baştutanlygynda üstünlikli durmuşa geçirilýändiginiň güwäsidir.
«Ýaşyl» ykdysadyýet ýörelgelerinden ugur alnyp, senagat toplumlaryny tehniki taýdan döwrebap enjamlaşdyrmak babatda zerur işler alnyp barylýar. Täze önümçilik düzümleriniň desgalarynyň gurluşygy, bar bolanlaryny döwrebaplaşdyrmak işleri ekologik howpsuzlygyň talaplaryna laýyk gelýän öňdebaryjy tehnologiýalaryň we täzeçil çözgütleriň ulanylmagy arkaly durmuşa geçirilýär.

Ýyldyz DURDYÝEWA
Aşgabat gurluşyk orta hünär okuw mekdebiniň mugallymy

Şanly menziller

Ahmedow — Thu, 19 Feb 2026 06:24:52 +0300

Häzirki döwürde Türkmenistan ykdysadyýetiň öňdebaryjy ugurlary bolan ýangyç-energetika, gurluşyk we senagat, himiýa, ulag-aragatnaşyk ulgamlaryny hem-de hususy pudagy ösdürmek babatda uzak geljegi nazarlaýan taslamalary durmuşa geçirýär. Türkmenistanyň geosyýasy hem-de geoykdysady taýdan amatly ýerleşmegi, ägirt uly uglewodorod ýataklaryna baý bolmagy hormatly Prezidentimiziň ýurdumyzy senagatlaşdyrmak, energetika serişdelerini eksport edilýän ugurlaryny diwersifikasiýalaşdyrmak boýunça amala aşyrýan syýasaty netijesinde soňky ýyllarda dünýä derejesinde ýangyç-energetika pudagynda onuň eýeleýän ornuny has-da berkitdi.
Mälim bolşy ýaly, ýurdumyzda yglan edilen «Döwlet adam üçindir», «Watan diňe halky bilen Watandyr! Döwlet diňe halky bilen döwletdir!» diýen çuň manyly şygarlar döwlet syýasatynyň many-mazmunyny doly açýar. Gazanylýan uly üstünlikler saýlap alan ösüş ýolymyzyň dogrudygyny tassyklaýar. Ýurdumyzyň Aziýanyň we Ýewropanyň çatrygynda ýerleşmegi giň gerimli halkara ulag geçelgelerini döretmäge mümkinçilik berýär. Häzirki döwürde halkara ähmiýetli örän iri ulag çatrygy hökmünde Hazar sebitiniň orny barha ýokarlanýar. Hormatly Prezidentimiziň parasatly baştutanlygynda ýurdumyz soňky ýyllarda oňyn halkara başlangyçlar bilen çykyş edip, parahatçylygy we durnukly ösüşi goldamagyň möhüm guraly hökmünde oňyn Bitaraplyk ýörelgelerini yzygiderli ilerledýär. Munuň özi halkymyzyň belent ynsanperwer ýörelgelerine esaslanýan hemişelik Bitaraplygyň parahatçylyk, durnukly ösüş ýaly umumadamzat gymmatlyklaryny ilerletmek babatda BMG bilen hyzmatdaşlygy yzygiderli berkitmegiň şanly wakalaryna beslenen şöhratly ýoluny alamatlandyrýar.

Aýgül GELENJÄÝEWA
Aşgabat gurluşyk orta hünär okuw mekdebiniň mugallymy

AGZYBİRLİGİŇ HEM-DE ROWAÇLYGYŇ ÝURDY

Ahmedow — Wed, 22 Oct 2025 05:22:02 +0300

Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň pähim-paýhaslary esasynda her bir güni, her aýy, ýyly örän möhüm syýasy, ykdysady, medeni hem-de jemgyýetçilik wakalaryndan doly täze taryhy döwürde ata-babalarymyzyň jemgyýetimizi birleşdirýän milli döwleti döretmek baradaky arzuwlaryny goldanyp, demokratik, hukuk we dünýewi döwletimiziň binýatlary berkidilýär. Türkmenistany dünýäniň durnukly ösýän döwletleriniň birine öwürmek boýunça tapgyrlaýyn işler amala aşyrylýar. Berkarar Türkmenistan agzybirligiň hem-de rowaçlygyň ýurduna öwrüldi. Häzirki wagtda Garaşsyz, hemişelik Bitarap Watanymyzy mundan beýläk-de ösdürmek ugrunda tutumly işler durmuşa geçirilýär. Täze taryhy döwürde döwletimiziň ykdysady kuwwaty artyp, halkara abraýy pugtalanýar, halkymyzyň hal-ýagdaýy barha ýokarlanýar. Raýatlarymyzyň watansöýüjiligi, häkimiýet bilen halkyň mizemez bitewüligi bolsa döwlet durmuşynyň binýady, kämil jemgyýetçilik gatnaşyklarynyň esasy bolup durýar. Şoňa görä-de, ýurdumyzda häkimiýet bilen halkyň, döwlet bilen jemgyýetiň arabaglanyşygyny has-da pugtalandyrmak babatda uly tagalla edilýär.
Ykdysadyýetimiziň pudaklarynda amala aşyrylýan özgertmeler ilatyň iş bilen üpjünçiligini gowulandyrmaga mümkinçilik berýär. Ýokary hilli, bäsdeşlige ukyply önümleri öndürmekde, azyk howpsuzlygyny berkitmekde, döwrebap senagat kärhanalaryny, şäherdir obalary gurmakda telekeçilerimiz uly işleri alyp barýarlar. Şolaryň esasynda, häzirki wagtda Türkmenistan ösüşiň ak ýoly bilen öňe barýar.

Sapar AMANGELDİÝEW
Türkmenistanyň Telekommunikasiýalar we informatika institutynyň talyby

ÖZARA BÄHBITLI HYZMATDAŞLYK

Ahmedow — Tue, 21 Oct 2025 18:05:55 +0300

Berkarar döwletiň täze eýýamynyň Galkynyşy döwründe hormatly Prezidentimiziň parasatly baştutanlygynda ata Watanymyzyň hemmetaraplaýyn ösdürilmegine, halkymyzyň abadançylygynyň ýokarlandyrylmagyna gönükdirilen giň möçberli işler durmuşa geçirilýär. Şunda durnukly ykdysady ösüşiň binýady hökmünde innowasion tehnologiýalaryň ornaşdyrylmagyna, sanly ykdysadyýetiň ilerledilmegine möhüm ähmiýet berilýär. Häzirki wagtda Türkmenistanda sanly ykdysadyýeti ösdürmegiň Konsepsiýasyny amala aşyrmak bilen bagly işler maksatnamalaýyn esasda alnyp barylýar. Mälim bolşy ýaly, ýurdumyzyň ykdysadyýetiniň ähli pudaklarynyň maglumat-aragatnaşyk tehnologiýalar binýady berkidildi, edara-kärhanalaryň, guramalaryň sanly ykdysadyýete tapgyrlaýyn esasda geçmegi üpjün edildi we olaryň maddy-tehniki binýady döwrebaplaşdyryldy. Sanly ykdysadyýetiň ösýän şertlerinde tejribeli milli hem halkara bilermenleri işe çekmek, ýokary derejeli hünärmenleri taýýarlamak işleri ýerine ýetirilýär. Milli ykdysadyýetimiziň pudaklaryna energiýa tygşytlaýjy we ekologik taýdan arassa tehnologiýalaryň giňden ornaşdyrylmagy ýurdumyzy durmuş-ykdysady taýdan ösdürmek boýunça milli maksatnamalaryň ileri tutulýan ugry bolup durýar. Alnyp barylýan döwlet syýasatynyň çäklerinde orta we uzak möhletleýin döwür üçin «Ýaşyl» ykdysadyýeti ösdürmäge, ekologik taýdan kabul ederlikli tehnologiýalary ornaşdyrmaga, daşky gurşawy goramak babatda innowasion çözgütleri işläp taýýarlamaga aýratyn ähmiýet berilýär. Şunuň bilen birlikde, sanly tehnologiýalaryň, «ýaşyl» başlangyçlaryň utgaşdyrylmagy hem zerur bolup durýar. Bu ugurdaky işleriň üstünlikli mysaly hökmünde türkmen halkynyň Milli Lideriniň başlangyçlary, hormatly Prezidentimiziň tagallalary bilen binýat bolan Arkadag şäherini görkezmek bolar. Ýurdumyzda «ýaşyl» ykdysadyýete geçmek boýunça işleriň çäklerinde ekoinnowasiýalary işläp taýýarlamak we ulanmak, ekologik taýdan arassa ulaglara geçmek, energiýa netijeliligini ýokarlandyrmak boýunça çäreler durmuşa geçirilýär. Türkmenistanyň ylmy-tehniki kuwwatynyň artdyrylmagy ekologik abadançylygy üpjün etmäge hemmetaraplaýyn ýardam edýär. milli ykdysadyýetimiziň ähli pudaklarynda serişde tygşytlaýjy tehnologiýalar giňden ornaşdyrylýar.

Adyl AMANOW
Türkmenistanyň Telekommunikasiýalar we informatika institutynyň talyby

BITARAPLYK – BAGTYMYZYŇ GÖZBAŞY

Ahmedow — Mon, 13 Oct 2025 07:07:21 +0300

Berkarar döwletiň täze eýýamynyň Galkynyşy döwründe hormatly Prezidentimiziň taýsyz tagallalary netijesinde, asmanymyzyň asuda, ýurdumyzyň abadan bolmagyny dilleriniň senasyna öwren pederlerimiziň eden arzuw-umytlary hasyl bolýar. Köklerini gadymyýetiň jümmüşinden alyp gaýdýan ata-babalarymyz parahat durmuşda ýaşap, ähli eşretlere ýetip bolýandygyna berk ynanypdyrlar. Şol ynam bilen hem, goňşy arasyndaky gatnaşyklarda hoşniýetli häsiýetlerimiz kemala gelipdir. Dünýäniň dört künjünde döwlet gurmagy başaran ata-babalarymyz hut şu häsiýet bilen tanalypdyr. 1995-nji ýylyň 12-nji dekabrynda Birleşen Milletler Guramasynyň Baş Assambleýasy taryhy Rezolýusiýany kabul etdi, şoňa laýyklykda, türkmen döwleti deňi-taýy bolmadyk halkara hukuk derejesine – hemişelik Bitaraplyk derejesine eýe boldy. Soňra 2015-nji ýylyň 3-nji iýunynda ikinji gezek ykrar edildi.
Mälim bolşy ýaly, 2025-nji ýylyň 21-nji martynda Amerikanyň Birleşen Ştatlarynyň Nýu-Ýork şäherinde Birleşen Milletler Guramasynyň Baş Assambleýasynyň 79-njy sessiýasynyň 61-nji plenar mejlisinde ýurdumyzyň başlangyjy bilen «Türkmenistanyň hemişelik Bitaraplygy» atly Kararnamanyň biragyzdan kabul edilmegi türkmen halkynyň kalbyna ganat bekledip, göwünlerimizde ýagşy-ýagşy umytlary oýardy. Indi ata Watanymyz Türkmenistan dünýäde Bitaraplygy üç gezek ykrar edilen döwlet hökmünde tanalýar.
Bitaraplyk türkmen döwletiniň Ýer ýüzünde parahatçylyk dörediji merkez hökmündäki ýokary derejä eýe bolmagyna uly goldaw berdi. Hormatly Prezidentimiziň taýsyz tagallalary netijesinde, türkmen döwletiniň işjeň ýagdaýda ýöredýän daşary syýasatdaky ugry tutuş adamzat tarapyndan oňlanylýar. Parahatçylygyň, ylalaşygyň we halklaryň arasyndaky dostlugyň hakyky merkezine öwrülen Aşgabatda Birleşen Milletler Guramasy we beýleki ençeme abraýly halkara guramalar bilen bilelikde uly forumlaryň we wajyp ähmiýetli duşuşyklaryň geçirilmegi munuň aýdyň subutnamasydyr. Türkmenistanyň BMG bilen hyzmatdaşlygy strategiki we uzakmöhletleýin häsiýete eýedir. Türkmenistan bütin dünýäde we sebit möçberinde söwda-ykdysady hyzmatdaşlygy ösdürmek meselelerinde daşary ýurt maýasyny, tehnologiýasyny, tejribesini ýurduň ykdysadyýetine giňden çekmek arkaly beýleki ýurtlar bilen hoşniýetli, dostlukly hyzmatdaşlygy ýola goýýar.
Bitaraplyk taglymaty – dünýä döwletleri bilen ylalaşykly ýaşamak diýmekdir. Bitaraplyk ýaş türkmen döwletiniň gülläp ösmegi üçin badalga boldy. Parahatçylygy we durnuklylygy saklaýan türkmen döwletimiz ykdysadyýet, medeniýet we beýleki ulgamlaryň ählisi boýunça çalt depginler bilen ösýär. Ýurdumyz Bitaraplyk derejesine daýanmak arkaly, halkara gatnaşyklaryny yzygiderli giňeldýär.

Aýnagözel ANNAGULYÝEWA
Aba Annaýew adyndaky Halkara atçylyk
akademiýasynyň mugallym-öwrenijisi

ARKADAG ŞÄHERINIŇ BEZEGI «AKHAN»

Ahmedow — Sat, 11 Oct 2025 07:44:38 +0300

Türkmen halkynyň Milli Lideri Gahryman Arkadagymyzyň başlangyjy boýunça gurlan we Arkadag şäheriniň bezegi bolan «Akhan» atly özboluşly heýkeltaraşlyk kompozisiýasy milletimiziň buýsanjy bolan behişdi bedewlere ählihalk söýgüsiniň nyşanydyr. Täze şäheriň dünýä ahalteke bedewlerini peşgeş beren gadymy türkmen topragynyň iň gözel ýerleriniň birinde gurulmagy hem aýratyn bellärliklidir. Häzirki wagtda behişdi bedewler Türkmenistanyň ähli ulgamlarda gazanýan uly üstünlikleriniň aýdyň nyşany bolup durýar.
Gahryman Arkadagymyzyň seýislän Akhan atly ahalteke bedewi 2018-nji ýylda 10 metr aralygy 4,19 sekuntda geçip, Ginnesiň Bütindünýä rekordlar kitabyna girmegi başardy. Milli Liderimiz «Ahalteke bedewi — biziň buýsanjymyz we şöhratymyz», «Gadamy batly bedew», «Atda wepa-da bar, sapa-da» atly kitaplarynda türkmen bedewine bolan hormatyny, söýgüsini çuňňur beýan edýär. Gahryman Arkadagymyz «Bedew» atly şygrynda:

Baýlyk kändir asman-zemin arada,
Ýöne saňa taý geljek zat nirede? —

diýip, ahalteke bedewiniň waspyny ýetirýär.
Täze şäherde «Arkadag Binasy» hem seniň ünsüňi özüne çekýär. Bu binada türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ahalteke bedewine atlanan aýgytly keşbi şekillendirilipdir. Munuň özi ýurdumyzyň ösüşiň täze belentliklerine uzaýan batly gadamlaryny alamatlandyrýar. Sütüniň ýokarsyna görk berýän altyn çaýylan bugdaý sünbülleri ýurdumyzdaky berekediň, bolçulygyň sungat dilindäki beýanydyr.
Tebigatyň täsiri esasynda bedewlerde ynsan syzgyrlygy, paýhaslylygy kemala gelipdir. Çyn bedewler ykbalynyň barha ýokary göterilýändigini duýýar, ol özüne şeýle bagty berenleri alkyşlaýar. Şonuň üçin hem Gahryman Arkadagymyzyň, Arkadagly Gahryman Serdarymyzyň tagallalary bilen halkymyz özüniň ruhy gardaşy — bedew atyny beýgeldýär, olar bolsa türkmeniň mertebesini beýgeldýär. Şunuň üçin hem halkymyz gamyşgulak, ýyndam bedew atlaryna buýsanýar.
Türkmen halkynyň uçar ganaty bolan ahalteke bedewleriniň şan-şöhratyny belende göterýän Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!

Gülälek REJEPGULYÝEWA
Aba Annaýew adyndaky Halkara atçylyk
akademiýasynyň mugallym-öwrenijisi

Arkadag şäheri parahatçylyk inženeriýasynyň aýdyň nusgasydyr

Ahmedow — Thu, 25 Sep 2025 18:42:04 +0300

BMG-niň Baş Assambleýasy tarapyndan “Halkara parahatçylyk we ynanyşmak ýyly” diýlip yglan edilen 2025-nji ýyl Türkmenistanyň Hemişelik Bitaraplyk hukuk derejesine eýe bolmagynyň 30 ýyllygyna beslenýär. Ýylyň şygarynda parhatçylyk, özara düşünişmek, dostluk ýaly adamzadyň iň gymmatly ynsanperwer ýörelgeleri öz beýanyny tapýar. Şu nukdaýnazardan, halkymyzyň bagtyýar, eşretli durmuşda ýaşamagy üçin ýurdumyzda uly işler alnyp barylýar. Gahryman Arkadagymyzyň we Hormatly Prezidentimiziň adam hakyndaky aladalary netijesinde, döwrebap infrastrukturasy, ýaşaýyş üçin ähli amatlyklary bolan, ekologiýa taýdan arassa täze şäher – Arkadag şäheri emele geldi. Bütin dünýäde Arkadag şäheri akylly şäher diýlip ykrar edildi we akylly tehnologiýalar we sanly ykdysadyýet ulgamy yzygiderli ornaşdyrylýar. Akylly şäheriň gurulmagy bilen adamlaryň durmuş-ýaşaýyş şertleri ýokary derejelere ýetdi, iş we ýaşaýyş jaýlary bilen üpjün edildi. Häzirkizaman dünýäsinde tehnologiýalar çalt ösýär. Şol sebäpli akylly şäheri döwrebap dolandyrmak, ösdürmek, kämilleşdirmek üçin sanly we akylly innowasion tehnologiýalary yzygiderli döretmek, durmuşa ornaşdyrmak, iş ýerlerini, täze senagat we hyzmatlar ulgamlaryny döretmek, adamlaryň ösýän isleglerini öwrenmek we doly kanagatlandyrmak, şäheriň ykdysady taýdan amatly bolmagyny gazanmak zerurlygy ýüze çykýar. Degişli meseleleri öwrenmek we ylmy taýdan esaslandyrylan çözgütleri kabul etmek üçin ýurdumyzda birnäçe sany ýokary okuw mekdepleri hereket edýär. Şol ýokary okuw mekdepleriniň mugallymlary we talyp ýaşlary akylly şäher tehnologiýalary boýunça ylmy-barlag işleri alyp barýarlar, innowasiýalary döredýärler. Arkadag şäheri parahatçylyk inženeriýasynyň aýdyň nusgasydyr. Sebäbi Arkadag şäheri hemmeler üçin bagtyýarlygyň, agzybirligiň, asudalygyň, parahatçylygyň nyşanydyr. Arkadag şäheri hemmeler üçin düşünişmegiň, ynanyşmagyň, adalatlylygyň, deňhukuklylygyň, howpsuzlygyň nyşanydyr. Arkadag şäheri hemmeler üçin gözelligiň, arassalagyň, kämilligiň nyşanydyr. Arkadag şäheri Gahryman Arkadagymyzyň we Hormatly Prezidentimiziň “Döwlet adam üçindir!”, “Watan halky bilen Watandyr! Döwlet halky bilen döwletdir!” diýen şygarlarynyň durmuşa ornaşdyrylýan şäheridir.

Akgül BAÝLYÝEWA
Türkmen döwlet binagärlik gurluşyk institutynyň mugallymy

Garaşsyzlyk toýumyza zähmet sowgatlary bilen barýarlar

Ahmedow — Wed, 17 Sep 2025 17:20:58 +0300

«Berkarar döwletiň täze eýýamynyň Galkynyşy: Türkmenistany 2022 – 2052-nji ýyllarda durmuş-ykdysady taýdan ösdürmegiň Milli maksatnamasynyň», şeýle-de «Türkmenistanyň Prezidentiniň ýurdumyzy 2022 – 2028-nji ýyllarda durmuş-ykdysady taýdan ösdürmegiň Maksatnamasynyň» çäklerinde durmuşa geçirilýän halk, Watan bähbitli, umumadamzat ähmiýetli işler Diýarymyzyň durnukly ösüşini şertlendirýär. Taryhy maksatnamalarda göz öňünde tutulan gurluşyk işleriniň üstünlikli amala aşyrylmagyna hem Türkmenistanyň Senagat we gurluşyk önümçiligi ministrliginiň Balkan welaýatynyň Türkmenbaşy etrabyndaky Balkan kän müdirliginiň işçileridir hünärmenleri saldamly goşantlaryny goşýarlar.

Günbatar sebitiň geografik taýdan amatly ýerleşişi, gazylyp alynýan tebigy baýlyklara, magdan känlerine baýlygy, şeýle-de uzak geljegi nazarlaýan ykdysady mümkinçilikleri hem müdirlikde işleriň belent görkezijilere beslenýändigine güwä geçýär. Häzirki zamanyň döwrebap tehnologiýalaryna, önümçilik tehnikalaryna daýanyp, olaryň güýjünden ýerlikli peýdalanýan kärhanada öndürilýän gurluşyk serişdelerem bu gün ýokary hil derejeleri bilen aýratyn tapawutlanýar.

Häzirki wagtda Günbatar sebitiň etrap-şäherlerinde, oba-şäherçelerinde gurluşyk işleriniň gyzgalaňly dowam edýändigini aýratyn bellenmäge mynasypdyr. Ýerlerdäki dürli maksatly binalary, desgalary gurluşyk serişdeleridir magdan däl materiallary bilen ygtybarly üpjün etmekde Balkan kän müdirliginiň zähmet topary hasam maksadalaýyk işleri bitirýärler. Şeýle önümler eziz Diýarymyzyň çar künjeginde alnyp barylýan möhüm gurluşyklara buýurmalar esasynda awtomobil we polat ýollar arkaly yzygiderli ugradylyp durulýar.

Öňdebaryjy kärhanada şu ýylyň başyndan bäri 31 million 275 müň manatlyk magdan däl serişdeleri öndürilip, bellenilen meýilnama 103 göterim berjaý edildi. Geçen hasabat döwründe hem 1 million 711 müň kub metre golaý magdan däl serişdeleri taýýarlanyp, degişli buýurmalar boýunça ugradyldy. Şeýle-de düzüminde demir magdany bolan dag jynsyny taýýarlamakda oňat netijeler gazanylyp, önümçilik meýilnamasy 111 göterim ýerine ýetirildi. Kärhanada keramiki kerpiji we diwar beton daşyny öndürmekde-de ýokary ösüşler üpjün edildi.

Şu günlerde bolsa kärhananyň agzybir işçi-hünärmenleri gazanylan üstünlikler bilen çäklenmän, buýsançly dowam edýän Halkara parahatçylyk we ynanyşmak ýylynda uludan toýlanylýan beýik Garaşsyzlygymyzyň şöhratly 34 ýyllyk baýramyny guwandyryjy sepgitlere beslemek üçin has-da öndürijilikli işleýärler.

Gurbanmyrat Tuwakow

Çeşme:«Altyn asyr» elektron gazeti

TÜRKMENİSTANYŇ HALK MASLAHATY-JEBİSLİGİŇ WE AGYZBİRLİGİŇ NUSGASY

Ahmedow — Sat, 13 Sep 2025 11:03:20 +0300

Berkarar döwletiň täze eýýamynyň Galkynyşy döwründe mukaddes Garaşsyzlygymyzyň 34 ýyllyk, hemişelik Bitaraplygynyň 30 ýyllyk şanly toýlaryna barýan Türkmenistanda ykdysadyýetiň öňdebaryjy pursatlary bolan ýangyç-energetika, gurluşyk we senagat, himiýa, ulag-aragatnaşyk pudaklaryny hem-de hususy pudagy ösdürmek babatda uzak geljegi nazarlaýan işler alnyp barylýar. Şeýle taslamalary halkara maýadarlar we hyzmatdaşlar bilen bilelikde amala aşyrmaga uly ähmiýet berilýär. Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň pähim-paýhaslary bilen Türkmenistanyň Halk Maslahatynyň ýanynda döredilen Ýaşulular geňeşiniň işine uly ähmiýet berilýär. Ýaşulular geňeşiniň agzalarynyň terbiýeçilik, wagyz-nesihat, ösüp gelýän ýaş nesillerimizi goldamak babatda ýerlerde alyp barýan işleri, oba zähmetkeşleri bilen geçirýän çäreleri agzybirligimizi pugtalandyrmaga, milli bitewüligimizi berkitmäge, watansöýüji nesilleri kemala getirmäge uly ýardam berýär. 2025-nji ýylyň 19-njy sentýabrynda bolsa paýtagtymyzyň Maslahat köşgünde Türkmenistanyň Halk Maslahatynyň nobatdaky mejlisi geçiriler. Mälim bolşy ýaly, türkmen halkynyň asylly däp-dessurlarynyň biri bolan möhüm wezipeleri ara alnyp maslahatlaşmak müňlerçe ýyl bäri milletimiziň durmuşynda dowam edip gelýän demokratik däpleriň biridir. Häzirki taryhy döwürde bu däpler ýurdumyzyň ösüşiniň esasyna, ileri tutulýan wezipeleri çözmekde jemgyýetiň hereketlendiriji güýjüne öwrüldi. Halk Maslahatynda Garaşsyz döwletimiziň ösüşinde gazanylan üstünlikleriň, ýetilen sepgitleriň, ýerine ýetirilen işleriň jemi jemleniler. Döwrüň talaplaryndan, täze ykdysady şertlerden ugur alyp, täze taryhy döwürde öňde durýan möhüm wezipeler ara alnyp maslahatlaşylar. Şeýle hem Halkara parahatçylyk we ynanyşmak ýylynda sebitde we dünýäde parahatçylygy üpjün etmekde ýurdumyzyň hemişelik Bitaraplyk syýasatynyň orny babatda öňde durýan wezipeler kesgitleniler.

Tawus DURDYÝEWA
Myrat Garryýew adyndaky Türkmenistanyň Döwlet lukmançylyk uniwersitetiniň Şöhle bilen anyklaýyş, bejeriş we onkologiýa kafedrasynyň assistenti