Himiýa pudagynyñ aýdyň ýoly

Ýurdumyzyň welaýatlarynda milli ykdysadyýetimiziň nebitgaz, elektroenergetika, gurluşyk, himiýa we beýleki pudaklaryna uly goşant goşýan kuwwatly kärhanalaryň sany barmak büküp sanardan kän. Türkmenabatdaky fosfor dökünlerini öndürýän himiýa zawody, «Tejenkarbamid», «Marykarbamid», «Balkanabat», «Bereket» ýod zawodlary, «Maryazot», «Garabogazsulfat» önümçilik birleşikleri, «Garabogazkarbamid» zawody we Garlykdaky kaliý dökünlerini öndürýän dag-magdan toplumy ýurdumyzyň ykdysady ösüşlerine mynasyp goşant goşýarlar.
Türkmenistany ýokary hilli, dünýä bazarynda bäsdeşlige ukyply önümleri öndürýän kuwwatly önümçilik düzümli senagat ýurduna öwürmek esasy maksatlaryň biri hökmünde kesgitlenildi. Şunda sanly ösüş, öňdebaryjy ylmy gazananlary we innowasion tehnologiýalary iş ýüzünde ornaşdyrmak gaýragoýulmasyz wezipeleriň hatarynda bellenendir. Milli ykdysadyýeti diwersifikasiýalaşdyrylmagyň ýoly hereket edýän pudaklary döwrebaplaşdyrmaga hem-de täze pudaklary döretmäge, daşary ýurtlardan getirilýän harytlaryň ornuny tutýan önümleriň önümçiligini artdyrmaga, ýurdumyzyň eksport kuwwatyny netijeli ulanmaga amatly mümkinçilikleri döretdi.
Senagatyň dürli ugurlarynda, gazhimiýa pudagynda, ulag-kommunikasiýa toplumynda we beýleki pudaklarda ýurdumyzyň eksport kuwwatlyklaryny ýokarlandyrmaga, halkymyzyň abadan durmuşyny üpjün etmäge gönükdirilen taslamalar amala aşyrylýar. Hormatly Prezidentimiziň «Änew — müňýyllyklardan gözbaş alýan medeniýet» atly kitabynda Ahaldaky tebigy gazdan ekologiýa taýdan arassa sintetiki awtomobil ýangyjyny öndürýän zawodlar toplumy barada has giňişleýin gürrüň berilmegi bu desganyň ähmiýetiniň näderejede uludygyny görkezýär. Dünýädäki ilkinji gazhimiýa kärhanasy bolan tebigy gazdan benzin öndürýän zawodyň esasy önüminiň EURO-5 ölçeglerine gabat gelýän ECO-93 kysymly benzindigini aýratyn bellemek ýakymly.
Türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň pähim-paýhaslary esasynda, häzirki döwürde eziz Diýarymyz ösen tehnologiýalara we innowasiýalara esaslanýan, ýokary depginler bilen ösýän, döwletli tutumlaryň dabaralanýan ýurdy hökmünde tanalýar. Mähriban halkymyzyň bagtyýar durmuşyny üpjün etmäge, sebit we dünýä ýurtlarynyň abadançylygyna gönükdirilen başlangyçlarymyz halkara jemgyýetçiliginde uly goldaw tapyp, hemişelik Bitarap döwletimiziň Ýer ýüzündäki abraýyny barha belende göterýär.
Ýurdumyzyň ykdysadyýetini durnukly ösdürmek, bazar özgertmelerini ilerletmek hem-de ilatyň durmuş şertlerini has-da gowulandyrmak döwlet syýasatynyň baş maksadydyr. Bu ugurda geljegi nazarlaýan tutumly maksatnamalar üstünlikli durmuşa geçirilip, şol sanda himiýa pudagyny ösdürmekde netijeli işler alnyp barylýar.

Öwezmyrat ÖWEZMYRADOW
Türkmen döwlet binagärlik gurluşyk institutynyñ talyby